ايش أشتري ¿

 

 

بسم الله الرحمن الرحيم

 تنبيه ! : التدوينة طويلة وشكرًا . 

تنبيه ثاني مهمّ مرة : شكرًا لصديقاتي غفران وأفنان على مساعدتي في ذي التدوينة 3> , ولصديقتي دنو على تحملها حلطمتي حول هذه التدوينة وشكرًا .


supermarket

 

أما بعد :

خلونا نكون صريحين، غالبًا إذا ما كان دائمًا إذا سمعنا أو شفنا كلمة تخسيس أو رجيم أو ” دايت ” تتركز بؤرة تفكيرنا على مواد غذائية معينة : تونة، بيض، توست أسمر، شابورة وشاي، ما نتعشى، غدانا سلطة ، شاي أخضر، حياة بلا سكر أو ملح .

 

ايش بعد أشياء تخلينا نشرد من هذا العالم ؟ 

 

فيه ناس بعد لما يسمعون أو يشوفون كلمة أكل صحي يجي ببالهم هالأشياء، اعترفوا تراي أشوفكم من هنا < على غرار الأستاذة الي واقفة عند السبورة ومسوية انها كافشة الناس الي ورا، بس ترى جد يمكن تشوفكم فلا تطلعون جوالاتكم ركزوا ياخي أنتم بنعمة طلب العلم 😦 < عادي كملوا كأنكم ما قريتم 

 

فنقول إنه الفكرة الغالبة الحين عن الأكل الصحي إنه يعني حرمان من الأكل، تقشف وعقاب وموت !

 

وييين يبويي ! لو إن الأمر هكذا لكنتُ أول الشاردين  !

لكن الأمر الواقع الي حدث لي إني حاليًا صرت أطبخ أكثر من لما كنت أطبخ قبل انتقالي لنمط الحياة القميل دوّات يا ربي شكرًا وحمدًا 

 

(عالشاطح لأفراد عائلتي الكريمة وصديقاتي العزيزات، شنعطيكم الوصفات وشتسوون لنفسكم، نظام سويلنا معك ما يقري يا قوم وشكرًا  )

 

مدونتي هذي بحول الله بتكلم فيها عن المكونات، عن الأشياء الي نشتريها لما نروح السوق، ما رح أعطي وصفات لكن ممكن أضرب أمثلة لكيف ناكل ذي المكونات، وانتوا ابحثوا عن الوصفات في الانستقرام، في برنامج fatsecret >تذكرونه ؟

نظامي بيكون كالتالي : أذكر المادة، كلام بسيط , سعرات ، وممكن من وين تنشرى و سعرها وهيك, الفوائد لو بأذكرها بتشمز التدوينة من كثر معلوماتها “صح تشمز؟” فلو حابين قوقلوا الشيء الي تبون تعرفون فايدته.

عامةً شيء كويس إنك تعرف إيش فوايد الشيء الي أنت بتاكلها قبل ما تشتريه .

 

طبعًا للمادة الوحدة مثل الشوفان مثلًا فيه أكثر من شركة تصدر شوفان ، راح أذكر الشركة الي جربتها  ولكن هذا ما يمنع إن فيه شركات أخرى معتمدة

 

عالطاري تعرفون دايجستف ؟ جا ببالكم لما قريتم كلمة رجيم صح ؟ تهقون إنه رجالن سنع والا ؟ هذا ما سنعرفه في نهاية التدوينة >شرايكم بالتشويقة ؟ 

 

طيب أنتم حاليًا بتروحون السوق إن شاء الله، فيه أشياء بناخذها للمدى البعيد بعون الله، وفيه أشياء ناخذها ونستهلكها و تخلص

 

الي للمدى البعيد المواعين ، الي تخلص الأكل >قولوا إني أفدتكم 

 

المواعين والأجهزة المهمة الي لو ما عندك اشتريها :

* أكواب معيارية

* ملاعق معيارية

* ميزان جرامات

 

أجهزة مو لازم تنشرى بس بتتسهل لكم حياتكم الطبخية بفضل الله

• آلة فليبس أو آلة القلي بدون زيت

• حماصة توست

• خلاط عصير “خلاط مو عصارة”

• جهاز وافل عشان الصباحات الأنيقة

• قوالب سيلكون وقوالب صنع الثلج وقوالب اسكريم

• مكرويف

• آلة صنع اسكريم ()

 

عاد الباقي أنتم أبخص 

 

طيب

ايش المواد الغذائية الي نحتاجها ؟

كارب، دهون، بروتين، ألياف وفيتامينات ومنكّهات ” بهارات وهيك “

المواد هذي طبيعيًا في كل صنف غذائي تكون موجودة بس تكون متركزة في مواد أكثر وشكرًا

 

خلونا ناخذ كل مادة ونذكر الأشياء الي تندرج تحتها في السوق

 

نتيجة بحث الصور عن ‪fat sources‬‏

 

 

الدهون أنا آخذها من زيت الزيتون، من الأفوكادو، زبدة الفول السوداني، مكسرات

فيه زيت جوز الهند بس للحين ما جربته مع إنه من الأمنيات الصغيرة ها جتكم فكرة هدية صغيرة تُسعدون بها قلبًا مسلمًا صغيرًا 

 

ايش كمان ؟ 

 

نبدا بزيت الزيتون

زيت الزيتون عاد شيء نعمة من ربي الحمد لله () الناس الي ما تحبهوش خسرانين يا جماعة > واضح إني بديت أدوام من تهجين الكلام دوّات  -> تراي أكتب في التدوينة من يوم الرجعة للدوام 

 

سعراته: في ملعقة الطعام الوحدة

119 سعرة

13,5 دهون

0 كاربوهيدرات

0 بروتين

 

الأفوكادو (هو فاكهة والا خضار؟)

نتيجة بحث الصور عن ‪avocado‬‏

خلوني أقولكم قصتي مع الأفوكادو

زمان قريت وحدة سوت صوص بالأفوكادو و تحمست و اشتريته وجلس في التلاجة لين خرب :/

بداية الحياة القميلة الي انا عايشاها بفضل ربي كنت أشوف صور سندوشات وكذا أفوكادو وأشوف ناس ياكلونه فأخذت بعد وفكيت وحده وأنا متحمسة وأذوقها !

يا ربي لك الحمد ! ماله طعم بتاتًا !

طبعًا رجعتها للتلاجة وجلست لين خربت للأسف 

 

هالمرة قلت أبغى أفوكادو حلفت أمي الله يسعدها ما تجيب، اشتريت طبعًا لكن الحمد لله أخذته وأنا عارفة ايش باسوي به 

حاليًا أنا ممكن أقطعه على البيتزا، مع خلطة مكرونة فتوتشيني مثلًا، في السموذي، ممكن تتسونه كصوص بديل للمايونيز أو صوص ينفرش ك طبقة على البيتزا

 

كيف نشتري الأفوكادو؟ 

أحسن شيء إذا بتاخذون كمية كبيرة تاخذون الي قاسي ولونه أخضر, يصير عندكم مدة حول 4-5 أيام لحد ما يصير ناضج 

أحسن شوفوا هذي الصورة عشان تعرفون احتياجكم 

how_to_pick___buy_hass_avocados___hass_avocado-2

 

سعراته في ال 100 جرام

 

199 سعرة

19.5 دهون

18 كاربوهيدرات

19 بروتين

 

المكسرات

نتيجة بحث الصور

من منا لا يحبّ المكسرات ؟ > يقالي مقدمة واو 

المكسرات زي عين الجمل (الجوز)، اللوز، بندق، كاجو، فستق

لكل نوع فوايده الخاصة أكيد، بس عامة  هي مصدر كويس للدهون

طبعًا بالنسبة لي أحسن لما تكون مو محمصة و مو مملحة، لأن هذا معناه ان فيه دهون زيادة ما ندري ايش هي انضافت لها، ومملحة يعني احتباس للمويه بسبب الملح،

 

السعرات تختلف حسب نوع المكسرة -> الحين هذا المفرد من مكسرات والا يقالي ؟

خل نشوف سعرات بعض الأنواع منها

 

الكاجو

10 حبات فيها

58 سعرة

4.9 دهون

1.7 كارب

1.7 بروتين

 

الفستق

10 حبات فيها

40 سعرة

3.5 دهون

2 كارب

1.5 بروتين

 

اللوز

10 حبات فيها

69 سعرة

6.1 دهون

2.4 كارب

2.6 بروتين

 

 

 

زبدة الفول السوداني

نتيجة بحث الصور عن زبدة الفول

وش أقول وش أخلي ياخي 3/>

برضه قصتي معها قصتن مقصوصة >شلوها > سلكوا

الزبدة بمعنى الخلاصة هذي الحاجة سبحانك ربي ما كنت أتخيل الناس كيف ياكلونها، حاليًا ما عندي مانع آخذ العلبة و أقضي عليها بالملعقة ياخي، بس فيه مانع عند عقلي يعنو 

المهم، زبدة الفول أنواع، المعتمد منها هو الي ما يحوي زيوت مهدرجة يعني لما تشوفون زبدة فول من مكوناتها زيت مهدرج ابتعدوا عنها قدر المستطاع، ووانتبهوا لسكرياتها تكون معقولة أو قليلة

 

ايش المشكلة ؟ ان الشيء الكويس الاورجانيك منها غالي يا حبيبي، العلبة الوحدة ممكن تجيك ب ٢٢ ريال !

ايش البديل ؟ ممكن فيه شركات أرخص وقريبة من المعتمد مثل شركة بيب, وهي الي أتعامل معها حاليًا وناوية أستمر عليها إن شاء الله

وفيه طريقة تتسوى بها زبدة الفول , لو كنتم تبغون زبدة صحية أنتم عارفين ايش مكوناتها وهي تاخذين فول سوداني مو مملح تحمصينه انتي وتطحنينه لين يقول آمين تخلطين معاه  محلي ستيفا مثلا وتحفظينها بالتلاجة حق ثلاث شهور، هذي الطريقة مو بالزبط لكن ابحثوا أكثر اذا عاوزين يعني , جربوها ما حتخسروش 

 

السعرات تختلف من شركة لشركة حسب مكوناتها بس عامة تتراوح السعرات من 180 ل 200 سعرة

شركة بيب الي أنا أستعملها الحين في ملعقتين الطعام فيه

200 سعرة

16 دهون

8 كارب

8 بروتين

 

سعرها : العلبة الكبيرة الحجم العائلي ” نتعامل بوه يبوي” ب 14 ريال تقريبا

كذا خلصنا بشكل عام مقاضي دهون والحمد لله .

 

نجي للكاربوهيدرات

 

الأشياء المهمة الي لازم تكون عندكم وتعتبر مصدر للكارب هي :

الشوفان، الرز الأسمر، بطاطس سواء حلوة أو عادية، خبز أسمر، توست أسمر، كرون فليكس كامل الحبة

العسل فيه كارب بعد، التمر، الموز والفواكه عامةً ، كاربوهيدرات جيدة ولطيفة

 

الشوفان يا أعزائي أول ما يجي ببالنا لما نقراه بتوع كويكر، شوفان سريع التحضير، وهذاك بالنسبة لي بعيد عن لذة الشوفان الحقيقي كل البعد

خلونا نشوف الفروقات بين أنواع الشوفان ونتعرف على هذا الكائن اللطيف بشكل مكثّف,

هالمعلومات منقولة من حساب بو درويش,

 

المهم شوفوا الصورة ,

2014-04-10 23.50.48

ونقلاً للكلام يقولكم :

Oat groat الصورة الأساسية للشوفان وهو شوفان كامل ومو متكرر كلش, يأخذ له ساعة طبخ وهو الأفضل .

Steel-cut (Irish , pinhead)  شوفان كامل حاله حال الأول ولكن قطعوه إلى قطعتين أو ثلاث عشان يسرعون طبخه, يأخذ له 20 دقيقة طبخ .

Scottish oatmeal  حاله حال الاثنين الي فوق بس مقطعينه لقطع أصغر عشان ينطبخ أسرع , يبيله 10 دقايق .

Old fashioned (Rolled) oat عبارة عن الشوفان الكامل مطبوخ وطاقينه لرقاق عشان تستفيدون على طبخ الفطور للي ما عنده وقت, يأخذ 5 دقايق

Quick oat عبارة عن () بس طابخينه أكثر وطاقينه أكثر عشان يكون جاهز أسرع, يبيله دقيقة بس -> هذا حق شوربة كويكر الي دايم يجي ببالنا لما ينقال كلمة شوفان . أغلب فوايده راحت للأسف

Oat bran  عبارة عن الألياف الي شالوها من الشوفان, ممكن إضافتها في الأكل لتعزيز القيمة الغذائية, يبيلها دقيقتين طبخ.

Instant oatmeal  شوفان شايلين منه كل الألياف والفوائد ويكون ضايفين له أشياء مثل سكر, ملح, فيتامينات, ونكهات, مدة الطبخ دقيقة.

Oat flour يعتبر شوفان كامل مثل النوع الأول لكن مطحوون عشان يستعمل في المعجنات بالتدريج والحلويات وغيره.

 

أفضل أنواع الشوفان النوع الأول مع دقيقه .

النوع الي أنا أشتريه هو هذا  rolled

20140411_070459

 

من الشوفان ممكن نسوي أشياء كثيرة، ممكن ناكله ك فطور مع حليب وفواكه وزبدة فول ، ممكن نسوي منه كوكيز وحلا، ممكن نطحنه كدقيق ونسوي به بانكيك ، ممكن نغطي صدور الدجاج به فيكون ك بقسماط

 

السعرات للنوع الرولد في ال 40 قرام ” حوالي حوالي نص كوب”

153 سعرة

3.5 دهون

22.7 كارب

5.1 بروتين

 

سعر هذي العلبة  أتوقع يا 23 أو 15

 

الرز الأسمر

أو الرز البني، أو الرز الكامل الحبة

أنا ما أدري ليه ناس كثير ما تحبه مع إنه رجالن سنع ,وشقردي 

الناس الي تدور الفايدة، ويهمها إنه الشيء الي تاكله ما يكون لذيذ وبس لا ، لذيذ ومفيد بعد فليتجهوا منذ الآن إلى استبدال الرز الأبيض المنخول إلى الرز البني كامل الحبة

على فكرة فيه أنواع كثيرة للرز مو بس نوع واحد أبيض وبني

 

 

السعرات في الرز البني متوسط الحبة, في نص كوب مطبوخ

109 سعرات

0.8 دهون

22.9 كارب

2.3 بروتين

 

البطاطس وما أدراك ما البطاطس ،  هذا الشي العشقي اللذيذ ، كلنا نعرف وإذا ما كنتم تعرفون فأنتم سوف تعرفون الآن إن شاء الله إن البطاطس من الخضار المفيدة، وإنها تساعد على إنقاص الوزن بعد ولكن وحطوا ولكن بين قوسين وتحتها ٤ خطوط

طريقة طبخ هالكائنة الجميلة هي الي تحدد لنا هل بتكون شي لذيذ ومفيد أو لذيذ ومدمّر 

بمعنى البطاطس المقلية هذي حطوا عليها x ، ليش ؟ لأنها تشربت الزيوت بشكل مو طبيعي غير انه اغلب فايدتها راحت يعني لا فائدة ودمار زيوت فوق كذا

خلونا نشوف البطاطس المقلية كم فيها سعرة في ال 100 قرام

فيها حوالي 342 سعرة

18.4 دهون

39.8 كارب

4.3 بروتين

 

هذا بس لو أخذنا بطاطسة وزنها 100 قرام وقليناها , يعني هذا حق بطاطسة صغيرة و تكّة تقريبًا

أدري صعبان عليكو دنا كنت بحبها كمان واللهِ بس صحتنا تهمنا يا جماعة , وفيه طرق تقلل من السعرات ولذيذة تمامًا 

 

البطاطسة الطبيعية لو أخذنا منها 100 قرام فيها 76 سعرة

و 0.3 دهون

و 16.1 كارب

و 1.7 بروتين

 

شفتم إنها مخلوق جميل؟ طريقة طبخه هي الي تحوله لكائن شرير أو تخليه زي ما هو جميل

 

ايش أفضل طريقة لطبخها طيب ؟

طبعًا يا مشوي يا مسلوق ولكلّ لذته يا أحباب،

ممكن المسلوقة نسوي بها بانكيك خضار أو كيكة بطاطس أو سلطة أي شيء

فيه كمان آلة جميلة قريت عنها كثير , الي هي آلة فليبس، تنطبخ الخضار بدون زيت أبدًا وتصير كأنها مقلية، فيه آلات تنحط معها كميات قليلة من الزيت .

 

طيب فيه عندنا نوعين بطاطس

بطاطس حلوة وبطاطس عادية

البطاطس الحلوة برضو منها شكلين

بطاطس حلوة بيضاء وبطاطس حلوة برتقالية

نتيجة بحث الصور عن ‪sweet potato and yam‬‏

 

ال ١٠٠ جرام من البطاطس الحلوة  المقطعة بقشرها ومطبوخة بشويي زيت مع شويي ملح فيها تقريبًا

90 سعرة

0.2 دهون

20.7 كارب

2 بروتين

 

نتيجة بحث الصور عن ‪bread‬‏

الخبز والتوست الأسمر من الأشياء المفيدة في الحياة > احلفي 

بالنسبة لي هو ألذ من الأبيض، سعراتهم مساوية للأبيض تقريبا بس الفرق في الفائدة،

الحاجة الي لازم ننتبه لها إن الخبز والتوست مكوناته تكون من دقيق القمح الكامل، لأن للأسف حاليا فيه شركات تصبغ لون الخبز وبس !

 

اقروا هذا الرابط  http://arab-diet.net/?p=917  فيه معلومات عن الفرق بين التوست الأبيض والأسمر .

 

تصدقون إن سعرات التوست الأسمر تختلف برضو من شركة لثانية, ممكن شركة توستها نخالة أو معاه حبوب وهيك

بس عامة تتراوح في الشريحة الوحدة من 50 إلى 80 سعرة .

وسعرات الخبز تختلف حسب وزنه برضو

 

نتيجة بحث الصور عن ‪corn flakes‬‏

كرون الفليكس وفي رواية كورن انتو وش تقولون ؟ 

في منه شركات عديدة ووفيرة

الكرون فليكس مهم ننتبه لكمية السكر فيه ، أنا أكتب وأمر إن الكرون من قمح كامل منتهي منه !

ونتتبه لكمية الألياف ونحاول ناخذ النوع الي كمية سكره وأليافه متقاربة

 

من أنواع الكرونات الي آخذها

ويتابكس

 

نتيجة بحث الصور عن ‪weetabix corn flakes‬‏ 

 

بران فليكس من نفس الشركة

 

صورة ذات صلة

 

 

الموسلي “وأفضل نوع ذا “

عبارة عن خليط شوفان ومكسرات والقرانولا نفس الحكاية،

الفرق إن القرانولا فيها محليات وزيوت، عشين كذا يفضلون البعض ياخذون موسلي ويبعدون عن القرانولا

السعرات برضو تختلف من شركة لأخرى لكلّه,

بس هنا طريقة إنكم تعرفون السعرات والمعلومات الغذائية للشركة الي أخذتوها جدًا سهلة

بس استعملوا واحد من برامج السعرات وامسحوا باراكود المنتج ويطلع لكم السعرات لكمية معينة 30 جرام مثلاً

 

أسعارهم:

الويتابكس وعامة الكرونات أسعارها في ال 20

الموسلي أذكر الكيلو منه في ال 40 ” ترا كيلو كمية مو هينة ما شاء الله وتستمر فترة طويلة حسب استهلاككم”

 

 

برضو عندنا المكرونة البر

يا جماعة فكرة الأكل الصحي كمقام أول صحة ومقام ثاني لذة

إذا احنا ناخذ أكل ما يفيد صحتنا ولذيذ ايش نستفيد ؟ ندمر جسمنا بس ؟

 

ليش أقول كذا ؟ لأني لاحظت أهلي ينفرون بشدة من المكرونة البر بحجة إن طعمها غير

بالنسبة لي صح طعمها غير عن المعتادين عليه بس خلاص أنا تعودت عليها ومع الخلطات الجميلة الي أسويها وبس 

 

من أفضل أنواع المكرونة البر الباستا الإيطالية هذي

20140411_083142

 

مكوناتها قمح كامل وماء فقط

وفيه كمان مكرونة مكوناتها سميد القمح وماء فقط وهذي بعد ممتازة

 

سعرات هذا النوع في ال 55 جرام منه

179 سعرة

1.1  دهون

36 كارب

6.3 بروتين

 

نتيجة بحث الصور عن ‪honey‬‏

نجي للعسل، الشيء الي لاحظته إن الأغلبية من حولي مو مستوعبين إن العسل كارب

 

الكاربوهيدرات عامة ايش هي ؟ سكريات !

والعسل عسل !>احلفي 

يعني مصدر من مصادر الكارب 

 

استغربت من ناس إنهم ما يحبون طعم العسل، واكتشفت فيما بعد إنهم ياخذون العسل الي في السوق

بالنسبة لي طعم العسل الطبيعي هو العسل ، عسل السوق أحسه كيماوي !   من جد ترا فرق شاسع جدًا بين طعم العسل الطبيعي الي من النحلة عالطول وبين هذاك الي في السوق والي يجي علب صغيرة ومدري ايش   ما أنكر في عسل المنصب طعمه جيّد 

العسل مفيد, و ربنا سبحانه وتعالى أقرّ إنه شفاء ,هذا لا جدال فيه, الجدال يا أحبتي حول الكمية الي ناخذها, أي شيء في الحياة مفيد مو مفيد الخ الخ لازم أخذنا منه يكون باعتدال , حتى المشاعر, حتى العقلانية, الجنون والفصلات في حياتنا, المرح, والاستقلال والتوحد والمخالطة كلّش باعتدال -> سلكوا للشطحة وسووا يعننكم متأثرين 

عندنا في ملعقة الطعام الوحدة

64 سعرة

0 دهون

17 كارب

0.1  بروتين

 

متخيلين لو أخذتو ملعقتين أكل عسل, كمية الكارب مقاربة للو إنكم أخذتم 55 جرام مكرونة ! 

عافية عليكم جميعًا .

 

التمر برضو من مصادر الكارب

وكلنا نعرف فوايده, و نعرف إنّه بيتٌ لا تمر فيه جياعٌ أهله 

في التمرة الوحدة حوالي

23 سعرة

0 دهون

12.2 كارب

0.4 بروتين

 

 نتيجة بحث الصور عن ‪banana‬‏

الموز بعد من مصادر الكارب، عشين كذا كانوا يخوفونا في أي نظام حرمان أو هذاك الي يسمونه رجيم >اي يعنني 

يقولون لا تاكلون موز !

أنا مع إنا ما نكثر موز، وما نكثر أكل عامةً

زي ما قلت من أول

صحيح العسل مفيد، صحيح الموز مفيد، بس الي يزيد عن حده ايش يصير ؟ ينقلب ضده عفية عليكم

الموز زي في الصورة يقطفونه وهو لسا ما نضج, وينضج مع مرور الوقت, إذا بدت تطلع فيه نقط سوداء هنا صار ناضج مرة وفي ألذّ حالاته !

لما يكون لونه أخضر تكون نسبة الألياف فيه كبيرة, لما يكون لونه أصفر منقط تكون نسبة السكريات فيه أكبر

 

الموزة الصغيرة فيها 72 سعرة

0.5 دهون

23 كارب

1 بروتين

 

الواجب عليكم تطلعون السعرات والمعلومات الغذائية في الموزة الواسط والكبيرة, من خلال برامج السعرات ,يالله مين أسرع 

 

كذا تقريبا سيّرنا على أبرز مصادر الكارب والحمد لله .

 

نتيجة بحث الصور عن ‪protein‬‏

نجي للبروتين وما أدراك ما البروتين 

معروف عن البروتين إنه مختص ببناء العضلات في جسمنا 

وهذا الشيء الي يحتاجه أي شخص يبغى ينزل وزنه نزول صحي، والشيء الي لازم يكتسبه الشخص الي يبغى يزيد وزنه بدل ما يكتسب دهون من أكل خنبقي 

العضل كل ما زاد في جسمنا تزيد عملية الأيض

وزن العضل والدهن نفس الشي مستوعبين ؟

يعني كيلو عضل نفسه كيلو دهن بس وين الفرق ؟ في الحجم وفي الصحة

 

 

ك ناس رياضية واحنا نسوي رياضة نوصل لمرحلة إنا نحرق الدهون الي في جسمنا، “الشيء المترهل في أجسامنا دهون”

ايش بعد الدهون ؟ لازم نعبي مكانها الي كانت تشغله بعضل حتى ما يسهل إنها ترجع مرة ثانية

فلذلك لازم ناخذ كميتنا اللازمة من البروتين لكل يوم

 

البروتين نلقاه في اللحوم

في البقوليات

في البيض طبعا

في الكويست بار

و بودرة البروتين

 

اللحوم زي الدجاج والسمك وسمك التونا واللحوم الحمراء

اللحوم الحمراء غير انها بروتين مليانة دهون فناخذ بالنا من هذا

الدجاج أفضل منطقة فيه لحمة الصدر لأنها أقل منطقة فيها دهون

التونا لما نشتريها ناخذ ببالنا تكون محفوظة في مويه، أو إنا نغسلها بالمويه لو كانت محفوظة بزيت، أدري إنه طعامتها في زيتها بس طعم الصحة والوزن السليم أطعم يا جماعة , أو حطوا معها زيت زيتون أو زيت دوار الشمس بس وازنوا نسبة دهونكم في اليوم !

 

الشي الي أنا دايم آخذه كمصدر بروتين هو صدور الدجاج

سعر النوع الي أنا آخذه  ٥٠٠ جرام ب ١٧ ريال

 

السعرات الحرارية في الصدر الواحد 100 جرام

101 سعرة

وفيه 1 دهون

و0 كارب

و 20 جرام بروتين

 

البيض أكبر خلية في الحياة الدنيا للآن >سووا يعننكم توكم تعرفون 

فيه طرق كثيرة لطبخه ويعتبر شي كويس لو تضمنت وجبة فطوركم بيض,

من قرائتي المتواضعة عرفت إنه ما فيه فرق بين البيض البني والأبيض في المعلومات الغذائية

 

في البيضة 50 جرام

70سعرة

5دهون

0.6 كارب

6 بروتين

 

الكويست بار وما أدراك ما الكويست بار   “يا كثر الما أدراكم عندي خخ

هذا الشيء يعتبر سناك، وبديل للسناكات الشريرة زي السنكرز ومارس و شلتهم, ووجبة جميلة بعد التمرين

فيه منه نكهات وميزته إنه الكويست الواحد فيه كمية بروتين عالية ! وكمية الكارب فيه جيدة جدًا ! وكمية الدهون بعد

 

صار متوفر في بعض المحلات زي بعض فروع بن داوود وبنده،  بحول 130 ريال، ممكن كمان تطلبونه من موقع Iherb

أو فيه حسابات تبيعه في الانستجرام وقد تعاملنا أنا وصديقاتي مع حساب راح أعطيكم حسابه في النهاية بإذن الله .

 

البروتين بودر هو عبارة عن مصل الحليب على شكل بودرة, وممكن يستعملونه كبديل للدقيق في صنع كيكات وحلويات لأن له نفس القوام بتوع الكيك, اللهم إن الكارب فيه قليل جدًا ممكن تكون معدومة , ونسبة البروتين عالية في المكيال ” السكوب” الواحد

البروتين بودر موجود في محلات لكن أسعاره غالية مرة, ممكن العلبة تجيك ب 400 ممكن ب 1000 !

أفضل شيء تطلبه من برا, أفضل نوع منه سعره ما يتعدا ال 200 لو طلبتاه من موقع أي هيرب المذكور آنفًا

فيه نكهات منه

ايش فايدته ؟ بروتين! , مصدر سريع للبروتين, بدل ما تشوي صدر دجاجة أو تطبخ بيضة أو أو, تأخذ سكوب من البروتين بودر على سموذي على شوفان لاب لاب لاب ابحثوا عن كيف تستعملونه

في المكيال الواحد تقريبًا 28 جرام بروتين ! حاقة هايلة صراحة الحمد لله ع النعمة

 

كذا شيكنا على مصادر البروتينات والحمد لله . 

 

نتيجة بحث الصور عن ‪dairy products‬‏

الحليب ومشتقاته من جبن ولبن وو يُعتبر من مصادر الدهون والبروتين

خطفة سريعة تقولكم إن جبن قريش قليل الدسم فيه

وحسب بحث صديقتي تقول إن 200 مل حليب تكفي الشخص في اليوم لا يزود عنها

 

طبعًا ما يحتاج أقولكم خذوا خضار وفواكه

 

وبالنسبة للمنكهات من بهار وكذا

أنا الأشياء الي أحب أستعملها 

فلفل أسود وفلفل أحمر -> عشق ()

بودرة ثوم

بريلمون -> عصير ليمون مركز

خل تفاح -> يعطي للأكل نكهة وريحة عجيبة, خاصة لما أشوي البطاطس وأحط منه في الخلطة ياوك !

صلصة صويا بس ما أكثر منها لأن الصوديوم فيها عالي ولو زاد الصوديوم في جسمنا يسبب احتباس الماء بالتالي زيادة الوزن

طبعًا ملح بحري

 

والسناكات فيه هذا السناك, يمشي حاله

طيب ممم من فين تشترون هالأشياء؟ للأسف مو كل المحلات تبيع هالأشياء

في مكة عامةً ممكن نلقى أغلب هالأشياء في بن داوود .

وهنا بحط لكم حسابات انستقرامية ممكن تلقون عندها هالأشياء

هذي محلات في السعودية, ممكن يوصلون لباقين مناطق المملكة وما أدري عن خارج المملكة !

2014-04-11 01.16.04

@nasar_sa1988

2014-04-11 01.17.56

@baytalseha

 

Screenshot_2014-04-11-01-20-31

هذا حساب الي طلبنا منه الكويست بار, والسعر حوالي 150 للكرتون

@healthy_bites01

 

من موقع آي هيرب بنلقى الكويست بار أرخص ب 120 الكرتون بس ما يمدينا ناخذ أكثر من نكهة في الكرتون الواحد, يعني نكهة وحدة وبس .

 

قبل ما أخلص, فيه حسابات في الانستقرام لرياضيين ومدربين فاهمين

من عندهم تقدرون تشوفون منتجات معتمدة, و يقيمون منتجات غذائية ويحفزون للحياة الصحية بفضل الله

 

@thedietninja

2014-04-11 08.47.56

 

 

@bodarwish

2014-04-11 08.49.18

 

 

 

@dietyoon

2014-04-11 08.50.29

 

 

@fatnes2fitnes

2014-04-11 08.51.51

 

 

 

اممم وبكذا أنُهي تدوينتي لهذا اليوم, الي ختمتها وأنا أكتب في جنح الظلام ولله الحمد . 

إن شاء الله تكون فكرتكم عن مقاضي الحياة الصحية تغيرت من مجرد الأكلات الشامزة الي مستحيل يستمر الإنسان طول عمره عليها و بس !

وقبل ما أطلع بالله شيلوا من بالكم فكرة إنه سيزر أناناس شيء واوي للناس الصحية, برضو بسكوت دايجستف  تبغون تعرفون ليش ؟ تبغون تقيمون المنتجات بنفسكم ؟ تعالوا هنا يالله نقرأها !

حاليًا أنا واقفة عند الباب والسيارة تحت و دق الجوال ,يالله مع السلامة ووداعة الله .( على غرار الحريم لا جو يطلعون من عند ناس  )

Advertisements

12 thoughts on “ايش أشتري ¿

  1. majed يناير 18, 2015 / 10:16 ص

    اشكرك صراحه استفدت كثير ومعلوماتك ونصائحك من ذهب الف شكر

    • molarya يناير 20, 2015 / 2:22 م

      الحمد لله والله ينفع ويتقبل، شكرا لكم

  2. Abdullah نوفمبر 8, 2015 / 2:41 م

    اهنيييك والله على هالشرح وهالتعب

    لك الاجر باذن الله

  3. Mohammad Abdul-Aziz يونيو 19, 2016 / 5:55 م

    ما شاء الله عليكي تبارك الله , الف تحية على صبرك على الكتابة ومعلوماتك القيمة وأسلوبك الجميل كمان 🙂

  4. tamaratori أغسطس 21, 2016 / 3:17 م

    شكرا كتير على المدونه،، كنت محتارة في انواع الشوفان وصراحة ما كنت الاقي غير نوع واحد في المول هو نفسه اللي انتي حاطة صورته وفكرت انه فقط للمعجنات لاني مو مستصيغة طعمه لكن رح احاول اعمل وصفاتك للشوفان
    يعطيك العافية

    • molarya يوليو 18, 2017 / 12:12 م

      بالعافية يا حلوة, الشوفان وحده مع حليب مو محمس للاستمرار عليه, لكن لما تضيفين إضافاتك المفضلة :زبدة فول, شوكلاتة دارك, مكسرات, فواكه, عسل, تمر, الي يناسبك ..بيصير إدمان !

  5. Sam يوليو 9, 2017 / 11:23 ص

    قسم بالله ودي احب رااااااااسك ،، ياخي درت كل قوقل مثل هيك المام وموضوع مالقيت هاتوووا هات راسك ❤️ يسلم راسك وتدوم انفاسك ابداااع واسلوب شيق وجميل ❤️🌹🌹🌹

  6. Sam يوليو 9, 2017 / 11:25 ص

    بتحفظ هالصفحه وارجع استفيد منها كل لحظه احتاج لشي او احد يسالني عن حميه او طريقه او دايت بعطيه هالرابط
    الف شكر بحجم السماء

    • molarya يوليو 18, 2017 / 12:07 م

      ممتنة لك والحمد لله, شكرا لكلماتك الطيبة وحماسك المشع =d

  7. Lulu نوفمبر 22, 2017 / 10:13 ص

    روووووعة روووعة ازيدينا من علمك النافع باذن الله

    • molarya نوفمبر 22, 2017 / 8:46 ص

      الله يسعدك ويرزقنا وياك من فضله 😘

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s